好多人鍾意飲酒，話一醉解千愁，但我從來未體現過咁既講法，猜梅猜輸要罰飲，如果係罰咁點解仲話飲酒係好野?
做呢份工咁耐，見過有關飲酒既衰野不計其數，飲完酒失控，打人、俾人打、同人嘈、跌銀包電話、仆親、醉駕撞死人、屋企掃野嚇親屋企人、搭車唔俾錢，種類繁多不能盡錄，飲得多又會狂嘔，醒返又頭痛到爆，成日飲又傷肝......有乜咁好呀有乜咁開心?定係因為借醉可以亂來唔使負責任?醒返仲多責任要負呀....
新聞講左咁耐，有d人繼續唔肯承認錯誤，始終推卸責任到其他人身上，係咪我脫左節，唔通呢個社會已經變到無承擔無責任?有錯要解釋到自己無錯，係人地錯人地迫你出錯......要死就一齊死!通常出錯後第一句係："無呀，因為.........."，"唔知呀"，"人地話架咋"，"都係佢衰囉"，而唔係"對唔住"，甚至係扮無野發生過。遊花園係皇道，政府係咁、政棍係咁，市民都係咁!!我自己都變成咁....點算?!
貪得無厭既人生就係遺憾同遺憾，知足常樂......但我仲未去到呢個境界，真係常落--經常失落，擁有但係永遠驚唔夠......係咪因為面對得太多轉變呢?不過d人唔係話面對得太多轉變先會明白知足既重要咩?我真係唔係好明.....
當生活逼得你連最親既人都見唔得多，成日得你自己一個人時，又可以靠咩來慰藉心靈呢? 只怕"成癮症"就成為一種"慰藉心靈"既都市病....
